Ex-TMG nangikil gisikop

Kanhi sakop sa Traffic Management Group (TMG) kinsa gikatahong mangilkil sa mga drayber sa sakyanan nga kargahan og mga hayopan nasakpan sa gipahigayong entrapment operation sa kapolisan sa Barili kagahapon sa buntag.

Nagtingkagol karon sa Barili Police Station detention cell si SPO3 Noe Urbiztondo, 53, lumad nga taga Surigao apan naa na magpuyo diha sa dalan Tres de Abril, Labangon niining dakbayan.

Nasakmit gikan ni Urbiztondo ang P200 nga giingong gikan gikilkil niini sa mga drayber P100 nga marked money nga gigamit sa maong operasyon ug paltik nga kalibre .45 nga pusil nga dunay upat ka buhing bala.

Usa ka polis sa Barili kinsa nagdumili sa pagpabutyag sa iyang ngalan nagkanayon kagahapon sa pakighinabi niini sa Banat News nga si Urbiztondo kanhi sakop sa TMG ug gilabay kini ngadto sa Caraga region sa Mindanao upat na ka adlaw ang milabay.

Matud sa maong polis nga posibleng na-AWOL na si Urbiztondo tungod kay wala kini mo-report sa bag-o niyang nadestinohan.

Usa sa biktima ni Urbiztondo si Servando Albarado taga Maigay Barili kinsa miluwat og affidavit kagahapon batok niya.

Niadtong Huwebes sa milabay'ng semana ang mga polis sa Barili nakadawat og reklamo gikan sa mga drayber kabahin sa giingong adunay polis nga mangatang unya parahon sila niini ug pangayoan sila og kawarta aron dili sila dakpon.

Ang ubang mga drayber gikatahong mohatag og P50, P100 ug dunay mohatag og P200.

Kagahapon sa buntag si Inspector Ricardo Nayne hepe sa kapolisan sa Barili, uban nila ni PO2 Marianito Morales ug PO3 Michael Santino mipahigayon sa entrapment operation.

Ang maong mga polis nangita og sakyanan nga dunay mga kargang hayopan aron ihatod sa Mantalongon diin matag Huwebes tabo sa maong lugar.

Si Morales maoy mimaneho sa sakyanan kunohay siya maoy drayber niini.

Si Nayne ug Santino diha sa likod sa sakyanan kunohay mga pasahero.

Gipara ni Urbiztondo, kinsa nagsul-ob og uniporme sa polis, ang sakyanan nga gisakyan sa maong mga polis ug gipangayoan niini si Morales og P100 aron dili sikopon.

Gihatag ni Morales ang P100 nga marked money ug gisignit dayon nila si Urbiztondo.

Gipasaka kagahapon sa korte ang kasong robbery extortion ug illegal possession of firearms batok ni Urbiztondo.

Si Urbiztondo sa iyang bahin, miangkon sa iyang ilegal nga kalihokan dihang giimbestigar siya sa mga polis nga misikop kaniya.

Matud ni Urbiztondo nga tungod sa pinansiyal nga problema ang hinungdan sa iyang nahimong kalapasan.

Ang Banat News napakyas og kuha og pamahayag ni Superintendent Abdalon Awilun hepe sa TMG tungod kay busy kini adunay giatimang mga bisita.