Security drills sa mga mall itumong sa Asean summit

Aron pagpalig-on sa seguridad atol sa upat ka adlaw nga Asean Summit karong Disyembre 11 hangtud sa 14 nakahukom ang mga opisyal sa siyudad sa Sugbo nga mopahigayon og subsob nga pagbansaybansay sa publiko og ngadto na sa mga nanag-iya og establisemento sama sa malls ug mga department store.

Kini mao ang pagpahigayon og training sa mga kawani sa nagkalainlaing establisemento aron duna kini kasinatian paggiya sa mga kustomer niini aron dili maratol ug malikayan ang posibling stampede nga mahitabo kun pananglit dunay mga mahitabong pagpamomba sa usa ka lugar dinhi sa dakbayan atol sa maong okasyon.

Mao kini gikasabutan sa gipatawag nga tigum nila ni konsehal Procopio Fernandez ug Konsehal Augustus Pe Jr. kagahapong adlawa aron pagdasig sa mga nagkalain laing mga dagkung pribadong tambalanan nga moabag sa pagpatuman sa maong programa.

Apil sa mitambong mao sila si Cebu City Fire Marshal Supt. Esmael Codilla, Supt. Mariano Natuel sa Cebu City Police Office, Capt. John Oliver Gabon sa Central Command, Dra. Victoria Laspiñas sa Cebu Medical Society ug Maximiano Suma-oy, hepe sa Security Department sa Cebu Holdings.

Atol sa maong tigum gikasabutan nga mopahigayon og security drill karong Nobiyembre 27 sa Ayala nga sugdan sa alas 7:00 sa buntag.

Nasayran gikan sa buhatan ni Fernandez nga apil sa gipadad-an og imbitasyon aron motabang og facilitate sa maong kalihukan mao ang Cebu Doctor's Hospital, Chong Hua, North General Hospital, Perpetual Soccour, Gullas Memorial Hospital ug Sacred Heart Hospital.

Ang tuyo niini aron makatabang ang mga representante ning maong mga dagkong tambalanan pagpasabot sa mga personnel ug sa publiko kun unsay himuon aron dili maratol kun dunay motumaw nga pagpamomba atol sa maong okasyon ug aron malikayan ang gikahadlokang stampede.