Organizing committee sa ASEAN Summit preparado

Gitug-an ni Ambassador Marciano Paynor Jr ang chairman sa National Organizing Committee sa 12th ASEAN Summit nga preparado na gyud ang organizing committee alang sa maong umaabot nga summit karong Disyembre 11-14 dinhi sa Sugbo.

Mao kini iyang gisulti dihang nahinabi sa mga tigbalita atol sa usa ka press conference kagahapon didto sa Marriott Hotel.

Matud pa niya aduna nay 95 ka mga kalihukan ug meeting ang nalista sa iyang buhatan ug iyang gipasalig nga ang tanan mapahimutang gyod sa saktong lugar kun asa sila magmeting.

Sa dihang gipangutana siya asa kasagaran kini mahitabo, matud pa niya 100 porsyento dinhi mahitabo sa Sugbo ug wala niya gitug-an kun sa CICC ba o sa Shangri-La Hotel, basta iyang gipasalig nga ang tanan ma accommodate gyod.

Iyang gitug-an usab nga dunay laing tulo ka nasud ang moapil nga dili sakop sa ASEAN nga mao ang Japan, Korea ug China, samtang lain usab nga gikan sa India, Australia ug New Zealand. Apil usab sa ilang interes nga magpadala sa ilang representante mao ang secretary general sa WTO, UN, UNESCO, UN Aids ug bisan gani ang European union.

Miingon si Paynor bisan pa man sa kadaghan nga mga interesado nga moapil dili gihapon kini angay nga kabalak-an in terms sa ilang mga puy- anan kay ang Hilton condominium units ug ang Plantation Bay Resort duna pay mga extra reservation.

Sa susamang kalambuan gitudlo isip tigpamaba para sa Summit si Ambassador Victoriano Lecaros ang kasamtangang ambassador sa Malaysia.

Si Lecaros gipresentar kagahapon ni Paynor sa mga sakop sa media atol sa usa ka press conference sa Marriott Hotel.

Matud pa ni Paynor napilian si Lecaros tungod kay nakahimo kini og dako nga papel niadtong milabay nga ASEAN Summit sa Malaysia ug siya usa usab ka Cebuano ug dali ra kaayong maduol sa mga Sugbuanong sakop sa media nga mokuha og mga balita atol sa summit.