8-anyos gi-molestiya sa uyoan

Nangunay sa pagsumbong niadtong Martes sa gabii diha sa kapolisan sa Talisay ang usa ka otso-anyos nga batang babaye kabahin sa pagmolestiya sa iyang uyoan kaniya.

Si Grace (ngalan gipugngan) residente sa dakbayan sa Talisay unang misulti sa iyang mga higalang bata kabahin sa maong insidente.

Ang mga higala ni Grace mitambag kaniya nga moadto sila sa Barangay Hall aron isulti ang nahitabo ngadto sa opisyal sa barangay.

Usa ka barangay tanod naabtan ni Grace ug sa mga higala niini diha sa Barangay Hall.

Si Grace misulti sa maong tanod kabahin sa nahitabo kaniya og gidala siya niini diha sa police station sa Barangay Poblacion.

Ang suspetsado ig-agaw sa inahan ni Grace kinsa nagpanuigon og 19 anyos, temporaryo kining nagpuyo sa ila tungod kay nagtungha sa usa sa mga kolehiyo niini dakbayan.

Base sa imbestigasyon sa Women's Desk Officer, ang insidente sa pagpanglugos nagsugod niadtong Hunyo niining tuiga ug katapusang insidente niadtong Lunes sulod niining buwana.

Ang mga ginikanan ni Grace nagkabuwag ug ang inahan niini busy sa pag-atiman sa ilang tindahan nga maoy ilang panginabuhian.

Ang apohan ni Grace nga mao untay magbantay kaniya tuyoon og painom sa suspetsado aron makahigayon kini og sulod sa kwarto sa biktima.

Ang suspetsado magdala og kutsilyo ini'g sulod sa kwarto ni Grace ug hulgaon niini ang biktimang patyon kun mosaba ug mosumbong sa iyang pagmolestiya niini.

Ang suspetsado kinsa mihimakak sa mga pasangil batok kaniya nasikop sa kapolisan sa Talisay ug giandam na kagahapon sa buntag ang kasong pagpanglugos batok kaniya.