Si Provincial Election Supervisor Edwin Cadungog miingon nga adunay dakong kahigayonan nga mahinayon ang eleksiyon sa Mayo 14, 2007 tungod sa maong direktiba.
Sumala pa niya nga nalatid sa 1987 nga Konstitusyon nga himuon ang eleksiyon matag ikaduhang Lunes sa Mayor kada tulo ka tuig.
Ang pilian sa sunod tuig nga eleksiyon mao ang mga mayor, bise mayor, konsehal, kongresista ug 12 ka bag-ong senador. Sa 2010 usab ang susamang mga opisyal ang pilion, dungan ang pagpili og bag-ong presidente.
Matud pa ni Cadungog nga nangandam na ang Commission on Election alang sa maong dakong kalihukang politikal sa nasud.
Ang Comelec, matud niya, nagpadayon sa pagpang-rehistro sa mga bag-ong botante sa umaabot 2007 nga eleksiyon.
Subay sa bag-ong direktiba, ang Disyembre 31, 2006 maoy katapusang adlaw sa aplikasyon alang sa rehistrasyon, samtang magsugod usab ang pagpanawat og certificate of candidacy alang sa mga nasyonal ug lokal nga kandidato sa Enero 15, 2007.
Ang katapusang adlaw pagsang-at og certificate of candidacy sa mga nasyonal ug party-list gitakda sa Pebrero 13, 2007 hangtod sa Mayo 12, 2007.
Ang lokal nga kandidato makasang-at sa ilang kandidatura kutob Marso 29, 2007 ug makapangampanya sa Marso 30, 2007 hangtod Mayo 12, 2007.