Gitusak makadaghan og kutsilyo namatay

Usa ka 22 anyos nga batan-ong lalaki ang namatay human kini dunggaba makadaghang higayon sa usa ka lalaki diha sulod sa Chinese cemetery sa sitio Lower Carreta sa Carreta ning dakbayan niadtong milabay'ng adlaw.

Ang biktima giilang si Junmar Bolabola,residente sa maong dapit nakaangkon og daghang samad dinunggaban sa iyang lawas diha sa atubangan ug likod human kini kaligui og dunggab sa suspek nga si Ferdinan Roflo alyas Tisoy,taga Hipodromo.

Sa imbestigasyon ni SPO3 Zenaido Pastorfide sa Homicide Section natino sumala pa sa duha ka mga menor de edad nga testigos kasamtangang nakig-estorya ang biktima sa usa ka ginganlan og 'Tata' dihang kalit nga miabot ang suspek.

Ang suspek diha miagi sa luyong bahin sa biktima ug walay daghang pangutana giduslak ang likod sa biktima makadaghang higayon bisan samaran nakadagan pa si Bolabola apan wala kini lung-i sa suspek ug gigukod kini hangtud nga naabtan ug giusban nasad og dunggab makadaghang higayon diha sa kalawasan.

Dihang nahagba ang biktima daling miikyas ang suspek ug wala na maabti sa mga mirespondeng kapolisan ug mga tanod sa barangay.

Gisusi pa karon sa Homicide Section kung unsay motibo sa pagdunggab apan gituuhang duna nay daang personal nga gibangian ang duha nga misangpot sa pagpatay kang Bolabola.