Pabrika sa muebles nasunog P1.4M ang gibilin nga danyos

Ang nasunog mao ang Country Craft International Corporation (CCIC), usa ka pabrika sa mga furniture nga pang-export nga gipanag-iya ni Tony Yu.

Base sa pasiunang imbestigasyon ni Mandaue City Fire Marshall Chief Insp. Oscar Mayol ug SFO2 Teresito Mata, nasuta nga didto magsugod ang kalayo sa finishing department diin base sa mga trabahante kalit kaayo ang pag-ulbo sa kalayo sa maong dapit.

Matud pa ni Mayol nga gumikan sa kemikal sa maong departamento maoy hinungdan sa pagkaylap sa dakong kalayo nga nakaugdaw sa maong edipisyo.

Hangtod karon, padayon pang giimbestigahan ang hinungdan sa pag-ulbo sa kalayo.

Atol sa maong sunog, walay naangol ug wala usab kini makatabok ngadto sa mga panimalay sa likod nga bahin sa maong kompaniya.

Matud pa ni SFO2 Mata nga gumikan sa kagamay sa dalan sa maong dapit, dugay napalong ang kalayo tungod kay ang pipila ka mga firetruck natanggong kini sa maong dalan ug maglisod kini pagkuha og dugang tubig.

Ang alarma nadawat sa kabomberohan mga alas 9:05 sa milabay'ng gabii ug nakontrolar kini sulod sa 50 minutos diin gipaubos kini sa 3rd alarm ug atol sa maong sunog si Mandaue City Mayor Thadeo Ouano personal nga misaksi sa maong hitabo inubanan ni Kapitan Emiliano Rosal sa Tabok.

Si Rosal miingon nga ila pang i-evaluate kun angayan bang kahatagan og tabang ang mga trabahante nga nawad-ang na sa trabaho human masunog ang CCIC.

Si Ouano magpaabot usab sa isumiter nga rekomendasyon ni Rosal ngadto sa iyang buhatan. Apan gipasabot niini nga dili salaping cash ang ihatag sa kagamhanang lokal ngadto sa mga biktimang trabahante sa CCIC.