Gidasmaga'g ambulansya

Grabe ang pagkaangol sa usa ka lalaki human madasmagi sa naghaguros nga ambulansiya sa Danao gikan nga naghatod og pasyente sa Vicente Sotto Memorial Medical Center sa dakbayan sa Sugbo. Ang aksidente nahitabo ala 1 pasado ang takna sa miaging kaadlawon sa eskina dalan A.C. Cortes ug M.L Quezon sa flyover Maguikay, Mandaue.

Ang biktima mao si Juanito Selvestre, 30 anyos, ulitawo nga nagpuyo sa Cabancalan sa maong dakbayan.

Gimaneho ni Alberto Bataluna, 59, minyo nga taga Poblacion sa dakbayan sa Danao ang ambulansiya nga nakadasmag sa biktima.

Si SPO2 Vicente Benabaye sa traffic section sa kapolisan sa dakbayan sa Mandaue nga gikahinabi sa Banat News miingon nga gikan sa dakbayan sa Sugbo ang ambulansiya nga gimaneho ni Bataluna.

Sa paghidangat niini sa maong dapit kalit lamang nga milabang ang biktima ug nadasmagan kini sa ambulansiya.

Dugang pa niya, si Bataluna kinsa maoy nagkarga sa biktima sa gimanehong ambulansya dali usab nga mibalik sa VSMMC alang sa dinaliang pagpatambal sa iyang nadasmagan.