Anak sa mga Regis nasikop sa ronda

Laing anak sa magtiayong gidudahang drug pusher nadakpan sa mga sakop sa Vice Control Section sa milabay'ng gabii diha sa Villagonzalo 2 sa Tejero ning dakbayan.

Ang nadakpan giilang si Antonio Regis alyas Anton, 33, residente sa maong dapit, anak nila ni Epifras alyas Tatay Pepe ug Gloria Regis nga nadakpan usab sa VCS ug Criminal Investigation and Intelligence Branch pipila na ka bulan ang milabay sa dakbayan sa Lapulapu.

Si Anton nasulod sa laang sa grupo nila ni PO3 Jeffrey Larobis human niya gikatahong gibaligyaan og usa ka paketeng shabu nga nagkantidad og P500 ang poseur buyer sa kapolisan.

Si Sr. Inspector George Ylanan, hepe sa VCS, mitug-an sa Banat News nga sukad nga nadakpan ang mga ginikanan ni Anton ug ang igsuon niining si Manic sa mga sakop sa Criminal Investigation and Detection Group 7 ning bag-uhay lang mao na kini mihulip sa pagpadagan sa operasyon sa drogas sa amihanang bahin sa lalawigan ug dinhi sa dakbayan sa Sugbo.

"Right after pagkadakop ni Gloria ug Pepe, siya maoy mi-take over sa drug operation sa Villagonzalo, samtang si Manic sa Consolacion, Liloan ug mga lungsod sa Norte, pero pagkadakop ni Manica, si Anton na ang nagdala sa tibuok Regis drug group," asoy pang Ylanan.

Sumala pa ni Ylanan maisip nga si Anton usa ka dakong drug pusher sa pagkakaron apan di pa lang kini kaayo pareho ka establisar sa iyang ginikanan tungod kay kaniadto back-up ra kini.

Gisubay na karon sa kapolisan ang korte kung dunay mga pending nga mga warrant of arrest si Regis diha sa korte tungod kay nagduda silang makadaghang higayon na nga naapil kini sa kiha apan kanunay'ng makaikyas.

Ang mga kabanay ni Anton mibabag ug miabog sa mga sakop sa media nga makuhaan kini og habig kabahin sa pasangil.