Gihilam-usan og bala, namatay

Usa ka lalaki ang gipusil patay sa duha ka mga lalaking nagsuot og bonnet ug nagluwan sa motorsiklo diha sa dalan Arca sa barangay Mabolo ning dakbayan niadtong milabay'ng gabii.

Ang biktima giilang si Leonardo Gomez, 45, taga dalan Pelaez sa barangay Sta.Cruz ning dakbayan kinsa gidul-itan og pusil diha sa nawong ug sa luyong bahin sa ulo sa wala pa mailhing mga mamumuno.

Duha ka mga lalaking diin ang backrider nagsuot og puti nga t-shirt ug short pants ug bonnet maoy gitumbok nga mipusil sa biktima samtang ang drayber nasuot og sweat shirt.

Ang gwardiyang si Jaime Candones, 32, nga nadestino sa usa sa mga establisamento sa maong dapit ang mitug-an nila ni SPO2 Rey Cuyos nga nakadungog lang siya og buto sa mga armas.

Sa iyang pagsusi, nakit-an niya ang biktima nga nagbuy-od ug wala nay kinabuhi, apan walay nakaila kaniya. Nailhan na lang kini sa iyang mga kabanay kagahapon na sa buntag.

Si Inspector Erlando Metante, hepe sa Homicide Section, mitug-an sa mga tigbalita nga ilang subayon ang anggulo sa drogas sa kamatayon sa biktima sanglit walay nakaila kaniya sa lugar ug giingong nakadawat sila og report nga dunay operasyon sa iligal nga drogas sa maong lugar.

Ang hepe sa Criminal Investigation and Intelligence Branch nga si Supt. Pablo Labra mitug-an sa mga tigbalita nga nakadawat siya og impormasyong miyembro sa grupo nila ni Epifras Regis ang biktima.

"Ang akong nadunggan bata-bata ni siya sa mga Regis, wala ta kahibalo basin sila-sila ray nag-away away, or basin siya'y gituohang nagpadakop, ato sang i-check kung tinuod gyud nga asset ni siya," asoy pang Labra.

Ang pagkapusil kang Gomez nahitabo duha ka oras human madakpi si Antonio Regis diha sa Villagonzalo 2 sa Tejero sa samang gabhiuna.

Walay narekober nga basiyo sa mga bala ang kapolisan diha sa crime scene gawas lang sa P5,063 nga kwarta diha sa bulsa niini ug usa ka silver wrist watch sa iyang pulsohan.