Kawani nakuryente natagak sa poste

Usa ka trabahante nga subcontractor sa Globe Telecom ang nakuryentihan ug namatay dihang kalit lang natagak gikan sa gisak-an niining poste human usab makahikap og live wire sa Cebu Electric Company.

Kini nahitabo alas 3 pasado ang takna sa hapon niadtong miaging adlaw sa sitio Suba, Poblacion, sa Argao.

Ang biktima mao si Gregorio Retisa, 30, taga Taloot, Argao.

Si PO2 Renato Nacaytona nga gikahinabi sa Banat News miingon nga nagtaud ang biktima sa cable alang sa linya sa telepono sa gisak-an niining poste.

Samtang didto kini sa ibabaw sa poste wala lamang damhang nahikapan niini ang live wire sa Cebeco ug nakuryentehan hangtod nga natagak.

Dugang pa niya nga dali untang gidala ang biktima sa Isidro Kintanar Memorial District Hospital apan nakabsan kini sa gininhawa.