Kampanya vs human trafficking lig-onon

Si Bokal Victor Maambong andam moduso og resolusyon nga mag-awhag sa mga internet providers nga mosagop o magpalig-on batok sa pagpadayon nga human trafficking.

Kini maoy unod sa iya unyang ipresentar nga resolusyon atol sa ilang regular nga sesyon karong Lunes. Matud pa niya, siya igo usab nagsuporta sa kinatibuk-ang plano sa gobyerno kabahin niini tungod sa pagpadayon niining klase nga problema sa nasud.

Gidugang pa usab ni Maambong nga iyang gihangyo ang mga tag-iya nga magmaabtikon sa pag-monitor kay sagad karong panahona sila lang ang gibantayan sa mga mogamitay niining internet ilabina sa mga batan-on nga may igong kahibalo nga moabli niining mga law-ay nga talan-awon sa cyberspace.

Usa usab sa iyang basehanan nga gitan-aw mao ang kasagaran nga pagtumaw niining giingon nga pagpahimulos sa mga babaye labina sa mga kabataan ngadto sa mga langyaw.

Tungod niini nag-awhag siya nga bantayan ug monitoron ang mga internet providers ug mga internet café kay hangtod karon duna pa gihapoy mga lugar diin dunay sekreto o private room sa pag- gamit og internet ilabina dinhi sa Sugbo.