Kap gibunala'g binugha sa anak, patay

Anak ang miunay og bunal og binugha sa iyang amahan nga kapitan sa ilang barangay samtang nag-andam og pagkaon alang sa panihapon sa ilang panimalay niadtong Miyerkules sa gabii didto sa Bulak, bukirang bahin nga gibana banang 20 ka kilometro gikan sa Poblacion, Dalaguete.

Gihulagway sa kapolisan nga ang suspek usa ka hilomon nga pagkatawo ug panagsa ra motubag kun pangutan-on apan dunay panahon nga dili normal ang tinubagan niini.

Si Rodrigo Mercado Camarillo, 48, kasamtangang kapitan sa Bulak, namatay pag-abot sa tambalanan human bunali og kahoy nga binugha sa iyang anak nga si Randy Cadiz Camarillo, 24, ulitawo.

Base sa pasiunang imbestigasyon sa kapolisan nga mitubag sa maong hitabo pinangulohan ni SPO2 Mansueto Lopez, PO2 Domino Rabanes ug PO1 Maximo Belciña, nasayran nga ang biktima diha sa sulod sa kusina kay nag-andam alang sa panihapon.

Giingon nga ang asawa ug igsoon sa suspek didto na sa ikaduhang andana.

Kalit lang miabot ang suspek ug midiretso'g sulod sa kusina nga nagbitbit nang daan og kahoy nga binugha ug may gitas-ong usa ka metros dayong bunal sa ulo sa iyang amahan sa makadaghang higayon.

Ang biktima nakaangkon og mga samad sa iyang agtang ug ubang bahin sa ulo hinungdan nga gidali pagdala sa Ildefonso Alcantara Memorial Hospital ug gibalhin sa usa sa mga tambalanan dinhi sa Sugbo apan gideklara kining patay nang naabot.

"Posibleng nilakaw ni (suspek) unya miabot gabii na nataymingan lang seguro diha ang iyang amahan sa kusina dayong bunal sa ulo og binugha," asoy ni PO1 Belciña, usa sa mga nakadakop sa suspek sa dihang nahinabi sa Banat News kagahapon.

Samtang ang suspek nasikop ra usab sa mga polis nga maoy miadto sa ilang panimalay.

Kasamtangan karong gitanggong sulod sa detention cell sa Dalaguete ang suspek samtang nagpaabot sa kasong parricide nga ipsaka batok kaniya.

Matud ni PO1 Belciña nga mipadayag na ang mga kabanay nga mopasaka gyud og kaso batok sa suspek.