Bank manager prisoho'g 1,228-tuig

Kadtong kanhi manager sa usa ka bangko diha sa Taboan nga gisilotan og 1,228 ka tuig nga pagkapriso, midangop na sa Court of Appeals sa pamasin nga usbon ang hukom nga gipakanaog sa Regional Trial Court.

Si Antonio Kee Soontit gisilotan og kapin sa usa ka libo ka tuig nga pagkapriso human siya mamatud-i nga sad-an tungod sa pagbulsa sa kapin sa napulo ka milyon ka pesos nga kwarta nga gideposito sa iyang kliyente.

Ang paagi ni Soontit mao ang paghimohimo og tseke nga kunohay giisyu sa kliyente nga si Juanito Go, apan ang tinuod si Go walay kasayuran sa maong transaksyon.

Si RTC Judge Geraldine Faith Econg mimando usab ni Soontit nga bayran ang bangko sa kantidad nga iyang nakawkaw, apil na ang interes nga ang tanan mo-total na og P12 milyones.

Kining kaso ni Soontit wala kaayo matribukar sa mga media sa Sugbo apan kini pa ang unang higayon nga dunay tawo nga gisilotan og kapin sa usa ka libo ka tuig nga pagkapriso.

Ang labing taas nga silot nga napahamtang sa hukmanan didto mahitabo sa Estados Unidos diin gikonbikto si Dudley Wayne Kyzer ug gisilotan og 10,000 ka tuig nga pagkabilanggo tungod sa triple murder sa Alabama.

Ang iyang gipatay mao mismo ang iyang asawa, ugangan ug usa ka laing tinun-an sa kolehiyo.

Sa dili madugay, resolbahon usab ni Econg ang awhag sa mga abogado sa bangko nga kanselahon na ang iyang pyansa aron tanggongon na g'yod siya sa prisohan bisan og duna pay pending appeal sa Court of Appeals.