Welder nahu'g sud sa CICC

Usa ka adlaw human sa deadline pagtiwas sa Cebu International Convention Center, usa ka welder ang aksidenteng natagak samtang naglimpyo sa Plenary Room sa CICC kagahapon sa udto.

Gidala sa Mandaue City District Hospital ang welder sa WT Construction nga si Ronnie Oaminal, 26, minyo, lumad nga taga Mactan, Lapu-Lapu.

Si Jane Rosalejos, nurse-on-duty sa maong tambalanan nga gikahinabi sa Banat News miingon nga nagisian sa iyang agtang, nabalian sa tuong bukton ug samadsamad sa lawas ang naangkon ni Oaminal. Apan luwas na siya sa makuyaw nga kahimtang.

Gihiling na sa mga espisyalista sa bukog si Oaminal.

Si Engr. Ernesto Viernes, project monitoring office sa Cebu Provincial Capitol mingon nga ang biktima didto maaksidente sa sulod sa Plenary Room, ang labing dakong lawak diin anha magtigom ang mga pamuno-nasud ug mga ministro sa Association of Southeast Asian Nation.

Dugang pa niya nga nahuman na ang pagpang-welding sa maong lawak ug ang finishing touches na lamang ang gihuman sa pagtrabaho sa sulod ug ingon man ang pagpanglimpyo.

Matud pa ni Viernes nga dili hinuon kaayo taas ang nahagbongan. Si Oaminal daling gitabang sa mga kaubang trabahante.

Giklaro niya nga bisan kawani sa WT Construction ang biktima apan ang kagamhanan sa lalawigan sa Sugbo mohatag usab og tabang niini.

Sa susamang takna, dul-an sa 50 ka militanteng pundok, lakip na ang mga minor de edad, mihimo og rally atubangan sa CICC kagahapon.

Si Insp. Frank Oriol sa Mandaue City Police Office ug team leader sa dispersal team nga gilangkoban sa 36 ka polis miingon nga ang rally gipangulohan ni Paul Rodriguez ug Jaime Paglinawan sa Bayan Muna.

Ang mga raliyista mi-eskala og hapit duha ka oras apan napakyas pagsulod sa CICC.

Malinawon hinuon ang rally, sumala pa ni Oriol.