P200 mil nada sa "budol"

Sobra sa P200 mil ang kantidad sa mga alahas nga nadala sa duha ka babayeng mangingilad gikan sa usa ka Overseas Filipino Worker (OFW) niadtong Miyerkules sa hapon diha sa Sityo Sangi, Tabunok, dakbayan sa Talisay.

Si Melony Montalban 36-anyos, residente sa nahisgutang lugar daling mitaho sa kapolisan sa Talisay kabahin sa maong insidente.

Si SPO2 Noel Factores, desk officer sa kapolisan sa Talisay mibutyag kagahapon sa Banat News nga ang mga suspetsado nagpaila nga mga negosyante og buwad ug kunohay nangayo kini og tabang sa biktima para mangita og sakyanan nga makargahan sa ilang usa ka truck nga buwad nga para i-deliver ngadto sa Santander bugti sa porsiyentong bahin nga ihatag kang Montalban.

Usa sa mga suspetsado ang mipagawas og puntil nga dunay sulod nga binandol nga salapi ug miingon nga ipasulod sa puntil ang duha ka bulawan nga kwentas nga nagkantidad og P9 mil ug lady's watch nga dunay batong mga diamond nga nagkantidad og P200 ni Montalban isip collateral.

Sa walay duha-duha gisulod ni Montalban ang iyang mga alahas ngadto sa puntil tungod kay miingon man ang mga suspetsado nga ibilin nila ang puntil sa biktima.

Si Factores midungag nga gipahuwat sa mga suspetsado si Montalban diha sa usa ka dakong tindahan sa Tabunok kay kunohay papirmahon pa sila sa tag-iya sa truck apan pila ka oras ang milabay gihiling sa biktima ang puntil tungod kay wala man gyud motungha ang mga suspetsado ug nasuta niini nga pulos diay tinabas nga papel ang sulod sa puntil.