Balay sa CA Justice gilabay'g M-203

Nakadawat og pagpanghulga ang usa ka Justice sa Court of Appeals human giitsahan og bala nga M203 nga gisulod og karton dayon gisulod sa paper bag uban sa suwat nga rest in peace (RIP) nga gilabay sa duha ka wala mailhing lalaki nga nagsakay og motorsiklo diha sa iyang panimalay sa Triumph town house subdivision sa may Andres Abellana ning dakbayan ug laing gilabay nga karton ug gisulod gihapon sa paper bag nga susama gihapon ang sulod niini kagahapon sa kaadlawon.

Ang unang pagpanglabay nahitabo alas 2:59 ang takna sa kaadlawon diha sa gate sa giabangan nga balay diha sa Andres Abellana ni Justice Marlyn Sison.

Segun sa report sa kapolisan usa ka kolor puwa nga XRM walay plate number ang giluwanan sa duha ka mga lalaki.

Ang backrider maoy miitsa sa paper bag atubangan sa gate sa balay ni Sison.

Usa ka security guard nga nailhan lang nga Millanes ang nagbantay sa gate ug maoy nakakita sa maong paper bag.

Si Millanes daling misusi sa paper bag ug gibukiki ang sulod niini ug nasuta ang sulod nga usa ka bala nga M203 ug may gipataban nga suwat, maoy hinungdan nga naaghat si Millanes sa pagtawag ug pangayo ug tabang sa kapolisan.

Ang tumoy sa bala nga M203 gipapitlan og tape ug gisuwatan "RIP", samtang dunay dakong suwat nga nakabutang "RIP Justice Marlyn Sison."

Usa ka oras ang nakalabay human sa unang insidente, lain na usab ang giitsa nga paper bag pasado alas 4:10 sa kaadlawon diha sa gate sa Court of Appeals sa may Salvador Extension, Labangon ning dakbayan.

Usa ka security guard nga si Remotigue sa Court of Appeals miasoy ngadto sa kapolisan nga duha ka lalaki nga nagsakay gihapon og motorsiklo kolor blue ang milabay sa paper bag atubangan sa duha ka security guard nga maoy nagbantay sa gate.

Daling nanawag sa kapolisan ang usa sa duha ka security apan niining higayona ang mga sakop sa Special Weapons and Tactics na maoy miresponde ug nasuta nga parehas lang ang sulod apan lahi ang agi sa sinulatan sa nahaunang pagpanglabay sa giabangan nga balay ni Sison.

Nasayran sa mga tigbalita nga 40-millimiter M203 sa grenade launcher ang maong bala.

Sa gihimong imbestigasyon ni Supt. Pablo Labra II sa Criminal Investigation and Intelligence Branch, ilang gituohan nga ang nadawat nga hulga sa kinabuhi ni Sison kabahin sa iyang trabaho.

Dunay duha ka polis nga gidestino ni Labra sa Court of Appeals ug laing duha ka polis sa giabangan nga balay ni Sison sa Triumph Town house sa Andres Abellana.

Matud ni Labra wala pa mosulti kaniya si Sison kun unsay nagpaluyo niini gawas lang sa pagduda nga kabahin kini sa gihuptang kontrobersiyal nga mga kaso diha sa Court of Appeals.

Gibutyag ni Labra nga una kining kasong pagpanghulga nga nadawat ni Sison.