Hilas nga negosyo sa Cordova

Nauso karon ang hilas nga matang sa negosyo ug panginabuhi sa usa ka hilum nga lungsod sa Cordova.

Ang tinubdan (ngalan gitagoan) mibutyag ning tigbalita nga kun ang kapolisan sa lungsod magkugi lang unta pagpaniid sa maong kalihukan, dili unta kini mokuyanap pag-ayo.

Base sa impormasyon nga gihatag sa tinubdan ning tigbalita, nga diha sa barangay Ibabao sa maong lungsod, sayon ra daw kaayo nga makakwarta.

Pipila sa mga hingtungdan mibutyag kaniya nga mo-show lang sila atubangan sa computer nga may webcam, kwarta dayon.

Usa ka babaye (ngalan gitagoan) ang giingong mangrekrut og mga babaye aron mo-show atubangan sa webcam.

Gisusi na sa kapolisan ug sa barangay kapitan ang iyang panimalay apan walay ebidensiya nga nakuha sanglit dali kaayong nakapanghipos ang tagbalay gumikan usab kay dunay look-out sa gawas nga mopindot kun dunay mga awtoridad nga mopadulong.

Atol sa maong pakisusi, giingong dali nga gipawong ang computer ug gipulihan og games.

Ang nagpasiugda sa negosyo giingong usa ka babaye nga minyo ug dunay anak babaye nga pasagdan lang nga makakita sa show sa iyang mga rekrut.

Ang ig-agaw sa maong babaye giingong nag-operate usab sa samang negosyo sa barangay San Miguel, lungsod sa Cordova.

Ang ig-agaw nga babaye (ngalan gitagoan) minyo usab ug naglain og negosyo aron mas daku pa ang iyang kitaon gikan sa mga gipang-rekrut nga mga babaye.

Ang tinubdan sa Banat News nagplano sa pagtaho ngadto sa kapolisan apan nahadlok siya nga dumtan hinungdan nga nidangop sa media aron mapahibawo ang mga ginikanan nga anaa kini nga matang sa negosyo ug masusi ang kalihukan sa ilang mga anak babaye.