Curfew sa Asean summit aprobado

Giaprobahan sa hunta probinsiyal sa Sugbo ang resolusyon ni Bokal Carmiano Kintanar nga nag-awhag sa tulo ka syudad sa Sugbo, Mandaue ug Lapu-Lapu sa pagpatuman sa curfew hours atol sa mga adlaw sa Asean Summit.

Apan ang kadagkoan sa Police Regional Office 7 wala mokalawat sa maong sugyot ni Kintanar.

Hinoon gipanalipdan ni Kintanar ang iyang resolusyon pinaagi sa pag-ingon nga usa lang ka sugyot ang iyang lakang ug anaa ra sa hingtungdang lokal nga kagamhanan ug sa kapolisan ang pagpatuman niini.

Matud pa ni Kintanar nga buOt lang niya nga bugnawon ang hunahuna niadtong mga nagplano og dautan atol sa Asean Summit ilabi na panahon sa kagabhion samtang magpahuway ang mga delegado.

Sa iyang bahin, si PRO-7 deputy regional director for operations, S/Supt. Lani-O Nerez atol sa sinemanang 888 News Forum sa Parklane Hotel kagahapon, miingon nga ang wala malakip sa ilang hisgutanan ang pagpatuman sa curfew hours.

Subli hinoon nga gipahibawo ni Nerez ang pag-ban sa mga armas de fuego sa mga lugar diin dunay kalihukan sa Asean Summit isip kabahin sa pagpatuman sa hugot nga seguridad sa maong kalihukan.