Imported nga mga buwak gitanom na sa kadalanan sa Cebu City

Imported nga mga buwak nga tuyong gipalit sa laing nasud gisugdan na sa pagbutang sa miaging semana sa matag "Island" sa kadalanan nga maagian sa mga delegasyon sa ASEAN Summit karong umaabot Disyembre ning tuiga.

Ang imported nga buwak gitakahong gigastoan sa dili mo- menus nga P434,000 ug dugay na nga napalit niadtong buwan sa Hulyo ug sa buwan sa Agusto ila kini nga gitanum pagkahuman sa konstraksyon sa improvised nursery ug matod pa liso pa kini sa dihang gipalit.

Sa paghiabot niini dinhi sa siyudad sa Sugbo ila kini gibutang ngadto sa nursery aron didto atimanon hangtod nga milabong ug nahimong maanindot nga buwak.

Si City Agriculture Joelito Baclayon nga gikahinabi sa Banat News miingon nga dul-an sa P1.9 million ang gitaganang budget apan ang uban nga nahabilin sa maong budget gihapak kini ngadto sa paghimo og improvised nursery ug uban pa nga kinahanglanon sa maong nursery.

"Actually ang budget gyud namo ana kay P1.9 million, ug ang among nagasto sa pagpalit sa mga liso mikabat ngadto sa P434,000 sa seeds lang na, ug ang uban gihapak sa pagpahimo og improvised nursery, soil ug uban pa nga kinahanglanon," matud pa ni Baclayon.

Matud pa ang mga liso nga ilang napalit gikan pa sa nasud sa Taiwan, ug niadtong Nobyimbre 6, ila na gisugdan og butang ang mga imported ug lokal nga mga buwak sa mga lugar diin makita nato sa mga kadalanan sa Osmeña street, Mandaue, Juan Luna, Mabolo, ug Lahug nga padulong sa Marco Polo Hotel diin moagi ang mga delegado.

Si Baclayon miawhag ngadto sa mga katawhan nga moapil og bantay sa mga tanum nga ilang gibutang aron dili kini pangawaton sanglit sa Disyembre pa man ang ASEAN Summit.