SK Nat'l Federation nangayog kagawan

Gitinguha sa National Federation sa Sangguniang Kabataan ang pag-usab sa balaod nga nagmugna sa SK aron libre na sila nga makapagawas sa pondo nga dili kapugngan sa mga kapitan.

Tungod kay kasagaran nga dili kaalyado sa SK chairman sa ilang lugar sagad mobabag sa mga proyekto nga buot ipatuman sa mga opisyal sa SK.

Matud pa, ang fiscal autonomy mao ray paagi aron klaro nga hatagan og gahum ang mga kabataan pag-implementar sa ilang mga proyekto.

Si National Youth Commissioner for the Visayas Benjie Oliva sa iyang bahin, niingon usab nga kinahanglan kining maong paagi aron ang mga SK magmalampuson dinhi sa nasud.

Ang National President sa SK Federation nga si Milton Mendador nibutyag usab nga mga 60 porsiyento sa SK sa nasud ang nakasinati og problema sa ilang kapitan ug konseho nga mopugong sa pag-release sa ilang pondo.

Gawas sa pagpangayo og fiscal autonomy, gitinguha usab sa SK Reform Bill ang pagpalapad sa edad sa mga kabatan-onan nga pwedeng modagan isip opisyal sa SK gikan sa 18-21 anyos.