Curfew atol sa summit way pulos

Mahulog nga walay kapuslanan ang gitinguha ni Bokal Carminiano Kintanar nga pagpatuman sa curfew dinhi sa Sugbo atol unya sa upat ka adlaw nga Asean Summit sa Disyembre 11 hangtud sa 14 bisan pa man og kaaprobahan ang maong resolusyon sa hunta probinsyal.

Kini gumikan kay gawas nga dakong supak ning maong tinguha si Mayor Tomas Osmeña, gipahibalo niini nga iyang manduan ang kapulisan dinhi sa dakbayan nga dili mopatuman og curfew atol sa maong summit bisan pa man og aprobahan ang maong resolusyon.

Sama sa pagsupak ni Osmeña sa pagpatuman sa gun ban, gihulagway usab niya ang curfew nga walay kapuslanan ug walay ikatampo pagpalig-on sa seguridad sa mga delegado sa maong international nga kalihukan.

Kini tungod kay alang sa mayor mosamot kadaghan ang trabaho sa mga polis kun ipatuman ang curfew tungod kay motutok naman unya ang kapolisan sa pag-monitor ug pagdakop niadtong mga tawo nga makalapas sa oras nga gipatuman sa curfew ug maluagan na ang pagbantay sa mga teroristang pundok nga maoy gikahadlokang magmugna og kagubot atol sa maong okasyon.

Nunot niini, padayong gibarugan ni Osmeña ang pagsupak sa pagpatuman sa gun ban tungod kay lig-on ang baruganan ni Osmeña nga responsable ug makatabang sa pagpatunhay sa kahusay ug kalinaw ang mga lisensyadong gun holder dinhi sa Sugbo.

Kini tungod kay miagi kini sa subsob nga seminar, psychological test ug uban pa. Midugang si Osmeña nga kun dili man kasaligan ang mga lisensyadong gun holder paghupot og armas bisan pa sa daghang mga seminar nga naagian niini, angay'ng basulon ang kapolisan nga maoy miisyu og permit niini. STATUS: More Stories to Follow