2 ka shift traffic enforcers gisugyot

Si Konsehal Arsenio Pacaña sa miduso og sugyot sa konseho sa siyudad sa pagpatuman og duha ka shift sa walo ka oras nga work scheme sa City Traffic Operations Management.

Si Pacaña sa iyang sugyot nagkanayon nga kinahanglang adunay mga traffic enforcer panahon sa gabii tungod kay sa gabii ang kasagarang mahitabong disgrasya diha sa kadalanan.

Ang Citom gihangyo nga magbutang og dugang traffic personnel diha sa mga lugar nga naobserbahang kanunay'ng huot ang trapiko ilabi na sa mga crucial intersection sa siyudad diin maghuot ang trapiko niini gikan sa alas 5:00 sa hapon hangtod sa alas 8:00 sa gabii.

Si Konsehal Sylvan Jakosalem, miyembro sa CITOM Board mihatag og ayuda sa pagtumbok sa mga lugar nga kanunay'ng maghuot ang trapiko.

Onse ka lugar ang gitumbok nga "traffic prone area" nga mao ang intersection sa F. Cabahug Extension ngadto sa Ayala Access Road, Cardinal Rosale Avenue, intersection sa Hipodromo ngadto sa M.J. Cuenco Avenue, ngadto sa Ayala Access Road, intersection sa dalan Avila ngadto sa Osmeña Boulevard, intersection sa dalan Villalon ngadto sa dalan Escario, intersection sa dalan Lopez Jaena ngadto sa M.J. Cuenco Avenue, intersection sa M.J. Cuenco Avenue ngadto sa dalan Bonifacio, dalan V. Sotto ngadto sa M.J.Cuenco, intersection sa dalan Zamora ug Legaspi, intersection sa dalan Legaspi ug Burgos, intersection sa Raintree Mall paingon sa Juana Osmeña, intersection sa Gorordo Avenue ngadto sa Beverly Hills ug intersection sa dalan C. Padilla ngadto sa SRP.

Matud ni Pacaña nga ang ubang mga motorista mohimo og kalapasan sa trapiko tungod kay wala nay mga traffic officers human sa office hours nga maoy oras nga maghuot ang dagan sa trapiko.

Sa gabii kasagaran adunay mahitabong aksidente sa kadalanan tungod kay wala nay mga traffic enforcer nga magbantay tungod kay adunay mga motorista nga dili motuman sa road regulations.

Ang konsehal nagkanayon nga ang pag-implementar og estriktong pagpatuman sa traffic rules mapahigayon matag adlaw sulod lang sa walo ka oras ug nakahatag kini og sakripisyo sa seguridad ug kasayon sa mga motorista ug pedestrian.

Apan ang CITOM walay igong pundo nga igahin alang sa duha ka walo ka oras nga serbisyo sa mga personnel.

Si Jakosalem mibutyag nga ang siyudad adunay 280 ka traffic personnel diin ang maong gidaghanon gikataho nga dili makasakbang sa kahuot sa trapiko sa siyudad.