Bangko way apil sa holiday ok

Walay pagsupak si Mayor Tomas Osmeña sa hangyo sa Cebu Bankers Association nga ma-exempted sila sa upat ka adlaw nga holiday atol sa pagpahigayon sa Asean Summit dinhi sa Sugbo karong Disyembre 11 hangtud 14. karong bulan sa Disyembre.

Alang sa mayor dili maka-apektar ang operasyon sa nagkalain-laing bangko dinhi sa dakbayan sa umaabot nga kalihukan gumikan kay gamay ra man ang mga empleyado niini kun itandi sa ubang mga establisamento ilabi na ang mga pabrika.

Apan padayong gibarugan sa mayor nga insakto ang iyang lakang paghangyo ni Presidente Arroyo nga ipatuman ang upat ka adlaw nga holiday aron mominos ang suliran sa trapiko dinhi sa dakbayan ug masayon lang ang pagpatunhay sa seguridad ilabi na sa mga delegado sa maong summit.

Samtang si Police Office regional director Chief Supt. Silverio Alarcio Jr. nisugyot sab kini nga kadto lang mga bangko nga ma-agi-an sa rota sa mga delegado sa Asean summit ang gihangyo nga manira isip kabahin sa seguridad.

Ang upat ka adlaw nga holiday sa Asean summit nga gi-aprobahan ni Presidente Arroyo nakasugat kini og pagsupak ilabi na sa mga negosyante nga gibati og kabalaka nga ma-apektuhan ang ilang produksyon ug dili makakuha sa quota tungod sa taas-taas nga bakasyon sa ilang mga empleyado.