Alahas ug salapi nadala sa kawatan

Sobra sa tunga sa milyon ang kantidad sa nadalang alahas, salapi ug cellular phone sa wala mailhing kawatan niadtong Huwebes sa hapon gikan sa residente sa Southwinds Subdivision, Cansojong, Talisay.

Ang magtiayong Jude ug Marilyn Buencanejo daling mitaho sa kapolisan sa siyudad kabahin sa maong insidente.

Si PO1 Achiles Alesen, polis sa dakbayan kinsa usa sa mipahigayon sa imbestigasyon sa hitabo mibutyag kagahapon sa Banat News nga si Jude usa ka kawani sa Bureau of Internal Revenue diha sa Tabunok.

Nadala sa kawatan ang mga alahas sa magtiayon nga dunay mga batong diamond nga mikabat tanan sa P500 mil, salapi nga US$500 ug 3630 nga Nokia cell phone balor og P18 mil.

Matud ni Alesen nga ang magtiayon wala diha sa ilang balay dihang nahitabo ang insidente.

Misaka sa pader ang kawatan dayon gitangtang niini ang birha sa bintana dapit sa kwarto sa magtiayon ug gitangtang ang upat ka blade sa jalousy ug gikuha ang maong mga alahas nga gibutang diha sa jewelry box lakip na ang salapi ug cellphone.

Ang Scene of the Crime Operation (SOCO) lakip sa mipahigayon sa follow-up nga imbestigasyon sa maong insidente.

Base sa natala sa blotter sa kapolisan sa siyudad sukad niadtong buwan sa Oktubre niining tuiga hangtod niining buwana mikabat na sa 21 ang insidente sa kawat.

Sa buwan sa Oktubre adunay duha ka natalang insidente sa kawat ug 19 niining buwana.