Air Force nag-wild gidakop

Laing sakop sa Philippine Air Force (PAF) nga nagmaoy sa kahubog gidakop sa mga barangay tanod sa Pusok, Lapulapu sa miaging gabii human sa kalit lang nga pag-wild niini.

Ang gidakop mao si Technical Sargeant Gregorio Laso, sakop sa 2nd Technical Wing Operation sa General Benito Ebuen Airbase sa Mactan sa maong dakbayan.

Ang nagdakop kang Laso mao sila si Gerry Patalingjug, Rogelio Larayos ug Romeo Abendan nga mga barangay tanod sa maong dapit.

Si PO2 Benidecto Bobilles sa investigation section sa kapolisan sa maong dakbayan nga gikahinabi sa Banat News miingon nga si Epelinda Berdin Argada, hingkod ang panuigon, minyo nga bayaw nga babaye sa maong suspetsado maoy nagreklamo.

Matud pa ni PO2 Bobilles nga manirado na unta sa iyang tindahan ang biktima apan nahidangat ang suspetsado nga hubog ug gihapak ang bongbong nga maoy hinungdan sa pagkabuak sa mga baligya.

Dugang pa ni PO2 Bobilles nga nagtuo ang biktima nga naghambin og kasuko ang suspetsado kaniya ug ipagawas lamang niini sa higayon nga mahubog na.

Si PO2 Bobilles miingon nga ang suspetsado kinsa gitanggong karon sa bilanggoan gipasakaan og kaso aron pabayron sa mga kadaut niining nahimo.