5 polis nang-utingkay way warrant

Usa ka ginang ang mipasangil nga dunay lima ka mga polis nga pulos nakasibilyan kalit nga misulod sa iyang balay ug mipasangil kaniya nga usa ka drug pusher ug miutingkay sa iyang mga butang niadtong milabay'ng Huwebes sa hapon.

Ang maong ginang nga si Emiliana Luayon, 42, taga Lower Lumar, barangay Lorega-San Miguel ning dakbayan mitug-an sa Banat News nga wala magpaila kaniya ang mga lalaki dihang iyang gipangutana kung unsay tuyo.

Si Luayon dala ang iyang anak nga batang lalaki nagkurog-kurog nga midangop kagahapon sa buhatan sa Internal Affairs Service aron pagsumbong sa insidente.

Matud pa niya nakit-an niyang pulos nagkwintas ang maong mga lalaki og tsapa hinungdan sa iyang pagtuong mga polis gyud ang grupo.

"Pag-abli nako sa pultahan gidiretso ra nila og duot ang pultahan kay mag-buy-bust kuno sila, giingnan ko nilang ipagawas na lang ang mga butang "Ging" mao to ako silang giingnan nga dili Gingging akong pangalan," asoy pa niini.

Gikatahong gipakitaan siya sa usa sa mga lalaki og usa ka paketeng giingong shabu nga diha daw napalit kaniya sa ilang asset ug gipugos nga sa iya kadto napalit.

Matud pa nga dihang iyang gipangutana ang ilang mga ngalan ug asang unit sa kapolisan sila nasakop giingong wala na magpaila ang mga tawo ug midiretso og saka sa ilang mga lawak ug giutingkay ang ilang mga sinena ug ubang mga butang.

Human bungkaga ang ilang mga butang, walay nadiskubrehang shabu o ba kaha iligal nga butang diha sa ilang balay hinungdan nga nanggawas ang maong mga polis ug wala na mobalik.

Apan pagsusi ni Luayon sa gibutangan sa iyang wedding ring ug nawagtang na kini, wala hinuon siya makasiguro kung ang maong mga tawo maoy mikuha niini apan nakahibalo siyang diha ra niya kini gibilin sa wala pa maabot ang mga nangronda.

Tungod niini nagpangutana siya sa mga silingan kung asa nga unit ang maong mga polis gikan, usa sa mga tindahan nga gikatahong gipalitan og sigarilyo sa grupo ang mitug-an nga sakop sila sa Crime Suppression Unit ug Vice Squad sa Cebu City Police Office.

Si Sr. Inspector George Ylanan mitug-an sa Banat News nga walay operasyon siyang gimando sa iyang mga sakop niadtong adlawa.

"Wala man mi operasyon anang adlawa diha sa lugar, akong giingnan ang taga IAS nga ipa-formalize una ang complaint kay wala koy problema nga mga police line up akong mga sakop, naa man tay balaod ipasubay nato sa sakto bisan kabalo ko nga way matudlo sa akong mga sakop dili sad mahimong i-line up sila nga way formal complaint," asoy pa ni Ylanan.