20 tikasan timbangan gisakmit

Sobra sa 20 ka mga tikasan ug dili rehistradong timbangan nasakmit sa mga sakop sa Revenue Monitoring Task Force gikan sa mga ambulant vendors nga naninda og mga prutas sa mga kadalanan dinhi sa dakbayan sa Sugbo.

Matud ni Demetrio Solon, inspektor sa maong task force nga mikabat sa 15 ka mga tikasang timbangan ug pito ang dili rehistrado ang ilang nasakmit gikan sa mga manindahay og prutas sa kadalanan niadtong miaging hapon.

Ang siyudad sa Sugbo mipahigayon og kalit nga pakisusi sa mga ambulant vendors diha sa dalan Borromeo, Colon, Juan Luna, Legaspi ug Pelaez human makadawat og daghang reklamo ang buhatan sa hepe sa Revenue Monitoring Task Force nga si Julie Cuenca.

"Daghan kaayo tang nadawat nga reklamo nga nagpahibalo nga dili insakto ang timbang, ang usa ka kilo mahimong ¾ na lang", dugang asoy ni Solon.