3 'apil' sa sedula scam gitaktak na's katungdanan

Gitaktak na ang tulo ka mga kaswal nga kawani sa cash division sa City Treasurers Office sa siyudad sa Sugbo nga nasakpang mi-tamper sa cedula nga lukaton sa mga negosyante dinhi sa dakbayan sa Sugbo.

Gibutyag ni City Treasurer Tessie Camarillo sugod kagahapong adlawa nga wala na patrabahoa ang maong tulo ka kawani nga sila si Melafe Tayuna, Gwendolyn Pacaña ug Maricor Pedrosa human mapamatud-i sa gipahigayong imbestigasyon nga may kasayoran pag-tamper sa kopya sa resibo sa lukaton nga corporate tax sa mga negosyante.

Pormal nga giluwatan ni Mayor Tomas Osmeña ang termination order sa maong tulo ka kawani niadtong miaging adlaw human mapamatud-i nga sad-an sa maong aligasyon.

Gikan niadtong milabay'ng bulan sa Pebrero hangtod sa Oktubre miabot na og P260 mil ang kinatibuk-ang alkanse sa panudlanan sa siyudad sa koleksyon gikan sa mga corporate tax nga gi-tamper sa maong mga kawani.

Apan giklaro ni Camarillo nga dili pa kini kumpleto tungod kay padayon pa karon ang ilang gihimong paghiling sa kopya sa tanang nakalukat og community tax aron mahibaw-an ang uban pang mga binuang.

Sa inisyal nga imbestigasyon sa City Treasurers Office nagpakita nga ang maong tulo ka kawani may kasayuran sa maong binuang ug wala matino nga dunay utok nga sindikato diha sa City Hall nga nagpaluyo.

Hinuon pagkakaron nagpadayon ang gipahigayong clean-up project sa City Treasurers Office aron paglimpyo sa tanang mga records aron mahibaw-an ang uban pang mga binuang.