1 ka kawatan matag adlaw target sa TRS

Usa ka kawatan matag adlaw ang dakpon. Kini maoy bag-ong estratihiya karong gipatuman sa Theft and Robbery Section aron mamenusan ang mga hulga sa publiko.

Si Sr.Inspector Alexis Relado ang bag-ong hepe sa TRS mitug-an sa mga tigbalita kagahapon nga ilang ipatuman karon ang "proactive" nga paagi aron batokan ang mga tulisan ug kawatan sa dakbayan.

Kaniadto gikatahong ang TRS mahulagway nga "reactive" lamang ang kampanya sanglit moaksyon sila kung duna nay mahitabo sumala pang Relado.

"This is our initial proactive method, instead of passive (huwat lang og dunay alarma) we will go into active instance, hindi na natin sila hihintayin ng titira pa bago natin hahabulin para at least ma-feel nila ang pressure," asoy pang Relado.

Matud pang Relado nga duna nay koordinasyon ang iyang buhatan sa Warrant Section aron maoy mohatag kanila og mga bag-ong abot nga mga warrant of arrest ilabi na sa mga tulisan ug kawatan.

Mohimo usab og bag-ong listahan ang TRS kung si kinsa ang mga tulisan ug kawatan sa matag barangay ug kini ilang ipa-validate sa mga barangay kapitan.

Ang maong pamaagi gipahibalo ni Relado sa iyang mga sakop niadtong Miyerkules nga mibunga dayon sa pagkaaresto sa duha ka mga gidudahang mga tulisan nga dunay mga warrant of arrest diha sa Upper Carreta sa barangay Carreta ning dakbayan.

Ang naaresto giilang sila si Liven Fajardo, 27 ug Louie Birig, 20, residente sa maong dapit, ang duha nasikop pinasikad sa warrant of arrest nga gipagawas ni RTC Branch 21 Judge Eric Menchavez.

Ang duha mitug-an sa mga tigbalita nga nagtuo sila na-dismiss na ang kaso sanglit mao kini ang gisulti kanila sa biktimang si Eugenio Aves nga taga dalan M.J. Cuenco sa Carreta kinsa nawad-an sa iyang cellphone ug P2,150 nga salapi niadtong Hulyo 14, 2005.

Ang duha maoy gitumbok nga armado og kutsilyo ug gitulis ang biktima sulod sa iyang balay.

Si Supt.Melvin Gayotin sa iyang bahin nahinangop sa pamaagi sa TRS sanglit alang sa opisyal matag hepe dunay kaugalingong kagawasan sa paghimo og mga plano nga makaayo sa ilang hurisdiksyon.