EX-CAFGU GIPUSIL SA AKRHO

Kanhi sakop sa Civilian Armed Forces Geographical Unit (Cafgu) gipusil patay sa tulo ka wala mailhing batan-on nga gituohang mga sakop sa Alpha Kappa Rho didto sa Sitio Greenhills, Poblacion, Lilo-an.



Si Insp. Milo Dagasdas miila sa biktima nga si Marlou Bugtai Mahinay, 43, nagpuyo sa naasoy'ng lugar.

Gitumbok nga mipusil ni Mahinay ang tulo ka batan-on nga gibanabanang nagpangidaron og 20-anyos.

Si SPO1 Wilfredo Caturza sa Lilo-an Police Station nagkanayon nga pasado alas 7 sa gabii, si Mahinay uban sa iyang kapuyo nga si Cleofe Consonsio, 30, nagtupad og lakaw paingong mopauli sa ilang balay.

Kalit lang mibutho ang tulo ka armadong batan-on diha sa luyo sa biktima dayong pusil sa makadaghang higayon.

Human sa hitabo, ang tulo ka batan-on yano ra kaayong nanglakaw pahilayo.

Si Mahinay daling gidala sa Eversly Child Sanitarium and Hospital sa Mandaue, apan gideklarar kini nga patay nang nahidangat kanila.

Siyam ka mga kabhang sa kalibre .45 ang nakuha sa mga sakop sa Scene of the Crime Operation didto sa lugar nahitaboan.

Sumala pa ni Insp. Dagasdas nga nagpa-blotter si Mahinay sa kapolisan sa Lilo-an sa miaging adlaw human makadawat og pagpanghulga sa kinabuhi sa iyang gikakontra.

Sa pakisusi nga gihimo sa Banat News, nasayran sa blotter sa Lilo-an Police Station nga gisumbong ni Mahinay ang usa ka Fergin Hatamosa, 20, nga maoy iyang gikaaway nga silingan.

Matud pa ni Dagasdas nga si Hatamosa kauban sa upat ka batan-ong lalaki nga mga sakop sa Akrho.

Sumala pa sa kapolisan nga nag-una sa listahan sa mga suspetsado sa pagpatay ni Mahinay ang mga sakop sa Akrho, bisan adunay moingon nga nagtaptap kini sa nawong tungod kay adunay uban nga wala magtaptap.

Laing anggulo nga gisundan sa kapolisan ang kalabot sa negosyo sa ginadiling drugas.