Total gun ban binugo - Tomas

"Binugo!"

Mao kini paghulagway ni Mayor Tomas Osmeña sa nakab-ot nga desisyon sa kapolisan pagpatuman sa total gun ban sa Sugbo atol sa ipahigayon nga 12th Asean summit sa Disyembre.

Atol sa press conference kagahapon sa udto giklaro ni Osmeña nga walay kapuslanan ang pagpatuman sa gun ban tungod kay dili kini makatabang aron maseguro ang kahusay ug kalinaw sa ipahigayong summit.

Matud sa mayor mosuporta lang siya sa pagpatuman sa gun ban kun mosanong niini ang mga teroristang pundok ug uban pang mga dautang elemento nga maoy hulga sa seguridad sa umaabot nga dakong kalihukan.

Gidasig pa hinuon sa mayor ang mga lisensyadong gun holder dinhi sa Sugbo nga padayong modala sa ilang lisensyadong armas gumikan kay dako ang iyang pagsalig niini tungod kay napa-ubos man kini sa mga subsob nga pagbansay- bansay alang sa hustong pamaagi paghupot og armas.

Alang kang Osmeña mas peligro pa hinuon ang mga polis gikan sa laing lugar nga gipakatap karon dinhi sa dakbayan alang sa Asean summit kun itandi sa mga lisensyadong gun holder dinhi sa Sugbo.

Gibasehan sa mayor ang nahitabong pagpabadlong nila ni PO1 Stuart Balang ug PO2 Junicar Estiñoso nga migamit sa Toyota Innova sa Mobile Patrol Group pag-check in og hotel kauban og babaye hinungdan nga nakabangga kini og taxi.

Nasayran nga si Police Regional Office (PRO-7) director Selvirio Alarcio Jr. mipahibalo kabahin sa pagpatuman sa gun ban atol sa upat ka adlaw nga Asean summit karung Disyembre 11 ug 14.