200 ka balay gidemolis duol CICC

Mokabat sa 200 ka mga barong-barong nga gitukod taliwala sa dakong kanal duol sa Cebu International Convention Center (CICC) sa Guizo ug Mantuyong ang gipangdemolis.

Si Mandaue City Legal Officer Rommil Erwin Heyrosa miingon nga ang pagpangguba sa maong mga estraktura dugay na nga gitinguha sa kagamhanan dili tungod sa CICC.

Matud pa niya peligro ang kahimtang sa residente kun magdaut ang panahon.

Kini ang hinungdan sa ilang pagpangita og relocation site sa barangay Canduman ug Casili aron kabalhinan ug mahimo nilang permanenting pinuy-anan.

Dugang pa niya nga gawas sa mga barong-barong duna say mga bilyaran, videokehan, tangkal sa baboy ug pansayan sa maong dapit.

Si Heyrosa miingon tungod niini nabara ang tubig hinungdan nga mangalisbo ang baho.

Ang pangulo sa Housing Urban Development Office (HUDO) sa dakbayan sa Mandaue nga si Frank Guillena nga gikahinabi sa Banat News miingon nga ilang ibalhin sa relocation site ang naapektohan nga pamilya.

Giklaro ni Guillena kadto rang way mga luna ang mahatagan og puwesto sa relocation site sanglit ang uban duna may mga lote nga wala maapil sa gidemolis nga lugar.