Mga armas, shabu nasakmit sa raid

Mga armas, shabu ug mga kahimanan sa paggamit ang nasakmit sa kapolisan sa dakbayan sa Mandaue sa mga pagpangronda sa miaging gabii nga miresulta usab sa pagkasikop sa lima ka tawo.

Ang lima nga nasikop mao sila si Jocelyn Fernandez, 36, dalaga, taga Pasil sa dakbayan sa Sugbo, Nieves Baunsit, alias Ebing Kimpang, 43, Vergel Harayo, alias Aying, 31, ulitawo, taga Mantuyong, Killad Soco, alyas Jenjen, hingkod ang panuigon, minyo ug Solomon Platero, alyas Omon kinsa pulos nagpuyo sa maong dapit.

Si Chief Inspector Leoncio Baliguat Jr., hepe sa kapolisan sa Presinto 5 sa Opao Police Station maoy nangulo sa maong pagpangronda.

Armado sa search warrant nga giluwatan ni Judge Marilyn Yap sa Branch 28 sa Regional Trial Court (RTC-7) gironda sa mga polis ang dapit.

Matud pang Chief Inspector Baliguat 14 ka pakete nga gidudahang shabu, usa ka armas nga kalibre .22 magnum ug usa usab ka kalibre .45 nga puno sa bala ang magazine ang ilang nasakmit.

Dugang pa niini ang cellphone, mga kahimanan sa paggamit og shabu gikan sa mga dinakpan.