Si Sr. Supt. Vicente Loot nga nahinabi sa Banat News kagahapon miingon nga iyang gibalhin si Ortiz didto sa Tudela sugod niadtong Martes kay walay opisyal ang maong lungsod.
Sa dihang gipangita ning tigbalita, matud pa wala dawata si Ortiz ni Mayor Demetrio Granada sa Tudela, si Loot miingon, "prerogative na kana sa mayor kun dili niya dawaton kay sa pagkakaron walay laing available nga opisyal nga akong idestino didto gawas kang Ortiz."
Matud ni Loot sa higayon nga magdumili gyud pagdawat ang mayor iya na lang kining ibutang sa Provincial Security Group diha sa Cebu Provincial Police Office samtang wala pay pormal nga reklamo batok ni Ortiz sa kaso nga gipasangil batok kaniya.
Si Ortiz kasamtangan maoy mihulip sa Officer in Charge sa Tudela nga si SPO3 Simplicio Montuerto.
Samtang si Ortiz nakasumiter na og counter-affidavit ngadto sa Provincial Internal Affairs Service (PIAS) sa CPPO.
Gihimakak ni Ortiz ang pagpabayad og P20 sa police clearance.
Matud sa unod sa maong affidavit nga usa lang ka donasyon ug walay gisita nga igong kantidad.
Gani iya usab nga gihimakak ang pagpangasaba sa iyang mga tawo ug ang paggamit sa patrol car paingon sa buwangan sa Naga.
Sa iyang bahin, si Supt. Edison Ardaniel, hepe sa PIAS mitug-an nga sa pagkakaron pre-charge investigation pa ang ilang gihimo ug ila kining iendosar sa hepe sa Intelligence and Investigation Division sa Regional Police Office (PRO-7).
Gisuwayan unta pagkontak sa Banat News si Mayor Demetrio Granada aron kuhaan sa iyang pamahayag apan pakyas kay sa unang tawag sa iyang cellular phone igo lang mibagting ug wala tubaga apan sa ikaduha dili na gyud makontak.