Pison gidam-agan sa magtiayong koreano

Magtiayon nga Koreano midasmag sa pison nga nagtrabaho sa pag-aspalto sa dalan agi'g pangandam sa Asean summit didto sa Pusok National Highway, Lapu-Lapu kagahapon sa kaadlawon.

Ang biktima mao ang magtiayong Park Sheung Joong ug ang mabdos niining asawa nga wala makuhai og ngalan sa kapolisan tungod kay maglisud pag-estorya og eninglis. Ang lalaki nga Park nagtrabaho isip tour guide sa usa ka Korean travel agency.

Ang magtiayong Park nga temporaryong nagpuyo sa Ibo dakbayan sa Lapu-Lapu, luwan sa Toyota Camry nga adunay plaka nga UTT 786 nga miagi sa national highway nga adunay gitrabaho.

Base sa pasiunang imbestigasyon ni PO3 Cerilo Lagumbay sa Traffic Division sa Lapu-Lapu nasayran nga samtang gikan sa Ibo ang magtiayong Koreano mga alas 12:30 kagahapon sa kaadlawon pag-abot sa ML Quezon Highway sa Pusok adunay nagpadayong pagpang-aspalto sa kadalanan.

Usa sa trabahante sa Venray Construction nga nag-implementar sa maong proyekto sa maong dalan misenyas nga molikay sa pikas nga dalan gumikan sa nagpadayong pag-aspalto sa maong dalan.

Si Park nga kusog nga nagpadagan sa iyang sakyanan didto hinuon milahos ug mibangga hangtod napasok sa pison nga nag-parking.

Ang pison nga iya sa Venray Construction gimaneho ni Dominador Desembre, 40.

Matud pa ni PO3 Lagumbay nga pag-abot nila sa nahitaboan wala na nila maabti si Park sa iyang sakyanan gumikan kay misakay kini og taksi dala ang iyang mabdos nga asawa sa usa ka tambalanan sa dakbayan sa Sugbo ug anaa kini sa kritikal nga kondisyon.

Hangtod ning pagsuwat sa balita wala pa motunga sa buhatan sa kapolisan si Park aron kakuhaan og mga pamahayag kalabot sa maong insidente, samtang padayon pa nilang gipangita ang biktima kun hain nga tambalanan kini gidala ni Park ang iyang asawa.

Ang Venray Construction maoy nag-aspalto sa kadalanan sa Lapu-Lapu ubos sa preparasyon sa nagsingabot nga Asean summit.