Kable sa Globelines gipangawat sa Talisay

Mikabat sa P150 mil ang kantidad sa kable sa telepono sa Globelines nga gikawat sa wala mailhing kawatan diha sa 1st street Carmen Village Poblacion, Talisay.

Ang maong insidente gituhoang nahitabo niadtong Nobiyembre 2 apan niadtong Martes lang kini nabantayan sa security officer sa maong kompaniya.

Ang maong kable nga nawagtang adunay gitas-on nga 50 metros.

Si Danilo Raboy, security officer, sa Globelines mitaho sa kapolisan sa Talisay sa maong insidente.

Base sa imbestigasyon sa kapolisan sa siyudad nga mipahigayon og imbestigasyon si Raboy sa pagkawala sa maong kable ug nasuta nga gikawat kini sa wala mailhing kawatan.

Si PO2 Narciso Alforque nagkanayon kagahapon sa Banat News nga posibleng gisaka sa kawatan ang posteng gikutayan sa kable ug giputol kini.

Ang kapolisan nagpahigayon og follow-up nga imbestigasyon sa maong insidente.

Kahinumduman nga dili lang mga kable sa telepono ang kawaton sa kawatan lakip na usab ang mga kable sa kuryente.

Ang mga kawatan gikatahong walay kahadlok nga mosaka sa mga poste aron putlon ang kable nga gusto nilang kawaton.

Gawas sa mga kable kuyanap usab karon sa Talisay ang kinawatay sa metro sa tubig bisan aduna nay nasakpan nga suspetsado niini.

Kahinumduman nga sulod sa tulo ka buwan sobra na sa 100 ka metro sa tubig ang nakawat.