9-anyos nakahikap sa poste nakuryente

Namatay ang usa ka 9 anyos nga batang babaye human makahikap og poste nga grounded sa live nga kuryente. Nahitabo kini niadtong miaging gabii sa Poblacion, Boljoon.

Ang biktima mao si Joan Maamo, 9 anyos ug Grade IV pupil sa Poblacion Primary School ug nagpuyo sa maong dapit.

Si SPO1 Roderick Roma sa kapolisan sa maong lungsod nga gikahinabi sa Banat News miingon nga ang biktima kuyog sa iyang inahan nga mitambong sa raffle draw nga gihimo sa kagamhanan sa maong lungsod.

Dugang pa niya nga ang inahan kinsa nakadaog pa sa raffle draw og usa ka sakong bugas humay mipauli ug nahibilin ang biktima nga nakigdula sa uban pang mga bata.

Matud pa ni SPO1 Roma nga samtang nakigdula ang biktima wala lamang damhang nahikapan ang poste sa suga nga grounded sa live wire nga maoy hinungdan nga kalit kining nakuryentihan.

Dali untang gitabang ang biktima ug gidala sa klinika ni Dr. Renato Amper sa nahisgotang lungsod apan gideklarar kining nakabsan gayod sa gininhawa.