Akrho gipusil

Naangol ang usa ka batan-ong lalaki nga sakop sa Alpha Kappa Rho Fraternity (Akrho) human mabiktima sa pagpamusil sa wala mailhing lalaki ug babaye nga nagsakay og motorsiklo.

Ang pagpamusil nahitabo sa miaging gabii sa dalan Bambi, Tipolo, dakbayan sa Mandaue.

Ang biktima mao si Richard Aldaba, 21, ulitawo ug nagpuyo usab sa maong dapit.

Si SPO3 Alfredo Andales, imbestigador sa Presinto 2 sa Subangdaku Police Station nga gikahinabi sa Banat News miingon nga ang biktima ilang nakompirmar nga sakop sa Akrho.

Nagbarog lang kini sa maong dapit dihang ang wala mailhing duha ka mamumuno nga babaye ug lalaki nga luwan sa blue nga motorsiklo kalit lang mitumaw ug namusil.

Nakabaton og samad pinusilan sa iyang abaga ang biktima ug dali kining gidala sa pribadong tambalanan sa dakbayan sa Sugbo.

Matud pa ni SPO3 Andales nga ang kalambigitan sa panagbangi sa fraternity ang nag-una sa mga anggulo nga ilang gihimoan karon og pakisusi.