Rollback sa plete sa LPG-powered nga PUJ, taksi suportado

Suportado sa tsirman sa committee on transportation sa konseho sa siyudad sa Sugbo ang tinguha ni Konsehal Arsenio Pacaña nga mo-awhag sa Land Transportation Franchising and Regulatory Board (LTFRB) aron ipatuman ang minus nga pletehan sa mga pampublikong sakyanan nga migamit og biofuel sama sa liquefied petroleum gas (LPG).

Ang maong resolusyon ni Pacaña gitakdang diskution atol sa sesyon sa konseho karong hapon. Nonot niini mipasalig si Konsehal Sylvan Jakosalem nga mo-lobby ang iyang komitiba sa transportasyon sa LTFRB aron mapatuman ang maong tinguha.

Alang kang Jakosalem maayo ang maong lakang aron ikapatuman ang mas barato nga pletihan sa mga PUJ ug taxi unit nga nagpa-convert ug migamit og biofuel nga mas barato ang presyo kun itandi sa mga giangkat nga produktong petrolyo sama sa krudo ug gasolina.

Apan kining maong lakang gipaabot nga makasugat og pagsupak sa habig sa transportasyon ilabi na sa mga drayber ug operator nga padayong miangal sa kanunay'ng pagsaka sa presyo sa mga palalitong spare parts ug mga nag-unang palaliton.