Ang mga biktima nga gikan sa dakbayan sa Davao City giingong dunay gitambungang panagtigum dinhi giilang sila si Janet Gamal Ong,38, Loraine Gaye Santos Rosales,26, Marie Joy Magpantay,33, Gertrude Flores Suriba,44, ug Marie Gracia Gutierrez,43.
Ang mga biktima pulos empleyado sa PCI Equitable Bank didto sa dakbayan sa Davao ug temporaryong nagpuyo sa West Gorordo Hotel sa dalan Gorordo ning dakbayan.
Matud pa sa imbestigasyon sa Theft and Robbery Section, ang mga biktima kasamtangang naglakaw sa eskina sa dalan Gorordo ug P.Calomarde sa barangay Camputhaw dihang gibabagan sa tulo ka mga wala mailhing mga lalaki nga sakay og usa ka motorsiklo.
Ang duha ka mga angkas nga gibana-banang 20 ngadto sa 25 anyos ang pangidaron ug 5'5 ang gitas-on armado og wala matinong mga kalibre sa armas mikanaog sa motor ug mition kanila dayong deklarar og tulis.
Gikatahong ang mga suspek mibahad pa kanila nga kung dili ihatag ang ilang mga butang huboan sila sa ilang mga sapot, lugoson ug pusilon hinungdan nga wala na mag-ukon-ukon ang biktima dihang gipanguha sa duha ang ilang gibitbit nga mga bag.
Nakuha gikan kang Ong ang iyang kwartang P3 mil, cellphone nga 6610 I, tiket sa eroplano ug mga importanteng dokumento, nakuha usab gikan kang Rosales ang pitakang nagkantidad og P2,800, kwartang P3 mil, ariyos nga perlas nga nagkantidad og P4,000 ug iyang cellphone nga P11,000.
Samtang nakuha usab kang Magpantay ang iyang P8,900 nga kwarta ug cellular phone nga 3310, nakuhaan usab si Suriba sa iyang wallet nga nagkantidad og P5,290, $25,cellphone nga N91 nga nagbalor og P35 mil, samtang nakuha usab kang Flores ang iyang bag nga nagkantidad og P3,800 ug mga importanteng dokumentos.
Lakip sa nadala sa mga tulisan ang mga importanteng dokumentos sa upat ug mga ATMs ug credit cards.
Human himolbuli ang mga biktima sa ilang mga butang daling nangikyas ang mga suspek sa wala matinong direksyon.