Polis vs sundalo ipasulbad og dali

Gimando ni Gobernador Gwendolyn Garcia ang dinaliang pagresolbar sa panagbangi sa usa ka polis sa dakbayan sa Lapu-Lapu kinsa gikaaway sa upat ka mga sundalong bisita dinhi aron mobantay sa ASEAN Summit.

Matud pa sa gobernador nga dili niya kinaiya ang mobahad sanglit ang iyang naandan mao ang pagsilot una pa mobahad.

"You know I don't like to give warnings, I just shoot and warn later. Well, I hope that proper sanctions have already been meted out to those who have erred. That should be a lesson to everybody," bahad pa sa gobernador.

Samtang gipugngan ni Sr. Supt. Vicente Loot, direktor sa Cebu Provincial Police Office ang pagpasaka og kaso sa polis batok sa upat ka sundalo samtang nagpadayon ang imbestigasyon sa National Bureau of Investigation ug huwaton nalang ang resulta niini sa maong kaso.

Matud ni Loot nga iyang gipugngan si PO2 James Ariel Fuentes aron dili modako ang kaso ug matud niya nga duna silay nasabutan tali sa kadagkuan sa militar nga paaboton ang resulta sa imbestigasyon sa NBI.

Nagtuo si Loot nga dunay igong rason kon nganong mi file og kaso ang upat ka militar ug wala makapaabot sa resulta sa imbestigasyon sa NBI.

Si PO2 Fuentes gipasakaan og kasong criminal ug administratiba sa miaging adlaw nila ni 2nd Lt. Edgardo Batinay, Cpl. Reynaldo Pallado ug Pfc. Dimas Capinig ug ang ikaupat si 2nd Lt. Randy Sotero sa Tactical Operation Center of Philippine Airforce.

Kon kahinumduman niadtong Huwebes ang upat ka sundalo giingong niparking sa sakyanan diha tunga sa dan sa Basak Lapu-Lapu.

Nakit-an kini ni PO2 Fuentes og giduol dayong badlong nga dili ipatunga ang multicab pag-parking.

Nitumaw ang kasuko sa upat ka militar sa dihang isyohan na unta og citation ticket ni PO2 Fuentes hangtod nitumaw ang lamoklamok ug nakulatahan ang upat ka military.

Atol sa maong insidente pulos nakainom sa ilimnong makahubog ang upat.