Sumala pa sa source nga dili palang dugay dunay miabot dinhi nga 15 ka tawo, trese niini mga babayeng gi-rekrut aron patrabahuon sa mga bars ug ang tulo mao ang mga gidudahang miyembro sa sindikatong nag-operate og mga negosyong prostitusyon.
Matud pa sa source nga usa sa mga babaye sa maong grupo ang nakustodiya kaniya human makasuhi sa usa ka salaod (di ikabutyag) nga nahimo ug ang korte mimando nga siya maoy mokustodiya niini.
Gikatahong ang maong babaye nga 18 anyos mitug-an kabahin sa operasyon sa grupo diin ang mga babaye ibaylo-baylo lang lakip na usab ang gikan sa Davao.
Nagtuo ang tinubdan nga dunay dakong pundong salapi ang grupo sanglit pag-anhi nila dinhi sa Sugbo luwan sila og abyon diha miagi sa Mactan Cebu International Airport.
Ang tinubdan mitug-an usab nga matag gabii ang maong mga babaye dad-on sa tulo ka mga inilang mga bars (ngan sa mga bars gipugngan sa Banat News) dinhi sa Sugbo luwan sa usa ka kolor puti nga van.
Gikatahong tulo ka mga lalaki ang nag-operate sa maong mga babaye dinhi sa Sugbo.
Apan si Chief Inspector Rex Derilo sa Criminal Investigation and Detection Group 7 sa pakighinabi sa Banat News mitug-an nga mahimo lang nilang mapasakaan og kaso ang nag-operate niini kun ang mga babaye moreklamo ug mohatag og pamahayag batok sa mga rekruter.
Mamahimong mapasakaan og kasong paglapas sa Akta Republika 9208 kun Anti-Trafficking in Person. Matud pa sa tinubdan nga mokooperar siya sa kapolisan kung gikinahanglan aron paghatag og dugang impormasyon kabahin niini.