PNP di motuo sa survey, pamolitika ra kuno

Dili motuo ang kapolisan dinhi sa Sugbo kabahin sa migawas nga survey nga nag-ingong ang PNP ikaduha sa labing banga sa pagkumparar sa 20 ka mga nasud nga gi-survey sa usa ka organisasyon sa Britanya.

Ang Surveillance Study Network sa Britanya nga maoy mihimo sa survey nagkanayon nga ang Israel maoy nag-unang nasud nga labing grabe sa kapalpak sa natad sa law enforcement, ikaduha ang Pilipinas ug ikatulo ang nasud sa Thailand.

Si Criminal Investigation and Detection Group 7 director, Jorge Corpuz mitug-an sa Banat News nga dili kini tinuod ug dili maapektahan ang organisasyon.

Matud pa niya nga pamolitika lang ang maong survey ug ang mga politiko lang ang angayang motubag kabahin niini sanglit alang kang Corpuz dili makita ang maong kapalpakan diha sa mga programa sa kapolisan.

"I don't believe this, I would rather want to be judged by my own people, if the people say that we are not doing good that's mas masakit and we have to look back on our programs to improve our services, this is a political ratings not a land based ratings, " asoy pang Corpuz.

Matud pang Corpuz kung ang Pilipinas maoy ikaduha sa nasud sa Israel, usa kini ka garbo sanglit ang maong nasud maoy dunay labing banggiitan sa natad sa intelligence gatherings.

Samtang si Chief Inspector Rex Derilo sa samang buhatan mipakagamay usab sa maong survey tungod kay wala kini magpakita sa kung unsay tinuod nga sitwasyon.

"A good indicator is the tourism influx is fast and growing and to include the heavy traffic congestion in the localities, that means people feels safer to stay outside," pamahayag pang Derilo.