PUJ gidumbol sa septic tank; 5 angol

Naangol ang lima ka tawo human ang PUJ nga ilang giluwanan kalit lang gidumbol sa trak sa septik tank nga maoy hinungdan sa kalit nga pagkalimbuwad niini.

Nahitabo ang aksidente sa miaging gabii duol sa giugmad nga Cebu International Convention Center (CICC) sa Ouano Avenue sa Reclamation Area sa dakbayan sa Mandaue.

Ang naangol mao sila si Emelito Germino, 37, taga Pilit, Cabancalan, Mandaue, Michelle Langayon, 23, Analisa Langayon, 24, pulos taga Singson Village, Subangdaku ug Garciano Almacin Jr., 34, taga Mabolo, dakbayan sa Sugbo.

Si SPO1 Vicente Benabaye, imbestigador sa traffic section sa Mandaue City Police Office (MCPO) nga gikahinabi sa Banat News miingon nga ang mga biktima dali nga gidala sa Mandaue City District Hospital apan gibalhin sa Vicente Sotto Memorial Medical Center sa dakbayan sa Sugbo.

Matud pa ni SPO1 Benabaye nga gimaneho ni Benvienido dela Rama, 40 anyos nga taga Ibabao Estancia sa dakbayan sa Mandaue ang PUJ ug gimaneho usab ni Suelio Cabiles, hingkod ang panuigon, minyo nga taga V. Rama, dakbayan sa Sugbo ang septik tank nga nakadumbol niini.

Dugang pa ni SPO1 Benabaye nga gikan sa dakbayan sa Sugbo ang PUJ ug ang septik tank nga nagsunod kalit lang nawad-an sa break ug nadumbol nga maoy hinungdan sa pagkalimbuwad niini.