Pagbutang surveillance cam estriktohon

Usa ka ordinansahon ang ipalabang ni Konsehal Sylvan Jakosalem nga nagmando ngadto sa tanang mga financial institution dinhi sa siyudad sa Sugbo nga magbutang og mga surveillance camera.

Kini maoy labing maayong paagi nga nahunahunaan sa konsehal aron masumpo ug mabulilyaso ang grupo sa mga tulisan nga milihok na usab og balik dinhi sa dakbayan niining nangaging mga adlaw.

Sa higayon nga ka-aprobahan kining maong balaodnon sa konsehal obligado na unya ang tanang mga bangko, pawnshop ug mga money lender company nga magbutang og surveillance cameras.

Gipasabot sa konsehal nga barato na lang karon ang maong ekipo tungod kay duna nay tag P7 mil ngadto sa P15 mil ang matag usa niini.

Gitug-an sa konsehal nga dili kaayo paborable ang mga tagdumala sa mga nahisgutang financial institution sa gisugyot nga magbutang og alarm system sa ilang opisina tungod kay nahadlok sila nga mabiktima unya sa pagpang-hostage ilabi na kun maka-responde ang mga polis ug magpabilin pang anaa sa sulod ang mga tulisan.

Gawas niini, magamit usab sa kapolisan ang footage nga ma-record diha sa maong surveillance camera sa pagtumbok sa mga suspetsadong tulisan gumikan kay mailhan man niini ang hulagway sa mga tulisan.

Pagkakaron, na-obserbahan sa konsehal nga lugak ra kaayo ang seguridad nga gipatuman sa maong mga financial institution dinhi sa dakbayan hinungdan nga nagpadayon sa ilang ka-agresibo ang mga tulisan.