5 na ka tawo patay aksidente sa motor

Lima na ka tawo ang namatay sa aksidente sa motorsiklo sulod lang ning semanaha gikan sa managlahing dapit dinhi sa lalawigan diin ang ikalima mao ang aksidente sa Balamban diin namatay ang usa ka sub-contractor sa Tsuneishi Heavy Industry sa maong lungsod kagahapon sa kaadlawon.

Ang namatay giilang si Ricky Bustamante,26, residente sa Kalag-itan sa Buanoy sa samang lungsod kansang motorsiklong gimaneho mikaliring sa karsada sa Abucayan, Balamban.

Ang biktima gikatahong trabahante sa Metaphil sa maong lungsod.

Sa spot report gikan sa Operations Division sa Cebu Provincial Police Office mitumaw nga nagmaneho ang biktima sa iyang motorsiklo gikan sa Balamban Proper padulong sa iyang pinuy-anan dihang nahitabo ang aksidente.

Matud pang PO1 Celso Makidato sa maong buhatan mitug-an nga dunay gwardiyang mipahibalo kanila kabahin sa aksidente diha sa maong dapit nga gidala sa Balamban District Hospital apan dead on arrival ang pasyente.

Ang biktima nakaangkon og daghang bun-og ug pangos sa kalawasan ug gidali og dala sa mga residente sa tambalanan apan gumikan sa grabeng kadaut nga naangkon namatay kini una pa makaabot sa maong tambalanan.

Kahinumduman nga niadtong Nobiyembre 2 , duha ka magsuong sila si Roberto, 26 ug Evelyn Medina, 23, uban sa ilang silingang si Thelma Evarda, 22, luwan sa usa ka motorsiklo dihang nasampak sa trak de karga diha sa Mantalongon lungsod sa Dalaguete, ang tulo padulong sa sam-ang aron managkot.

Niadtong milabay'ng Biyernes, namatay usab ang usa ka ginang nga si Marrie Mapoy samtang naangol usab ang iyang banang si Wilfredo human mabanggai sa wala pa matinong sakyanan diha sa Bulacao, dakbayan sa Talisay.

Tungod sa kakusog sa pagbangga nangalagpot ang duha ug ang babaye maoy nagrabehan nga nakaingon sa hinanali niining kamatayon. - Edwin Ian Melecio