Ilonggo vs Waray sa Parian way sulbad; kamatayon sa 3 ka tawo way kalambuan

Wala pa gihapoy kalambuan ang mga imbestigador kabahin sa nahitabong pagpusil patay sa tulo ka mga tawo diha sa Parian niadtong milabay'ng Septiyembre 27 ning tuiga nga naglambigit sa panagbangi sa mga Ilonggo ug Waray-Waray.

Usa sa mga imbestigador sa Homicide Section nga si SPO1 Dennis Moga mitug-an sa Banat News nga hangtod karon wala pay bisan usa sa mga kaliwat sa mga biktima ang miduol sa ilang buhatan aron paghatag og pamahayag kabahin sa insidente.

Ang nangamatay giilang sila si Earl Rodrigo Lumaing, 23, nagpuyo sa dalan Logarta apan lumad nga taga Guiuan, Eastern Samar, Miles Oliver Cortez, 16, taga Borongan, Eastern Samar apan kasamtangang nagpuyo sa dalan Bonifacio ug Millard Montederamos, 22, kinsa non-organic personnel sa Bureau of Customs dinhi sa Sugbo.

Usa ka nag-inusarang suspek nga gihulagway nga mestisuhon ug may pagkataas ang buhok ang gitumbok nga mipusil sa tulo samtang nagduwa og baraha diha sa door one sa Mercedez apartment sa dalan Ibarra ning dakbayan.

Base sa pasiunang imbestigasyon nagduda ang kapolisan nga dunay kalambigitan sa rehiyonal nga grupo-grupo sa mga batan-on ang motibo sanglit nasayran nga giingong dunay gikaaway nga pundok ang grupo sa mga biktima nga mga pundok usab sa mga Hilongo.

Sumala pa sa hepe sa Criminal Investigation and Intelligence Branch nga si Supt. Pablo Labra ilang nasuta nga gikaaway sa grupo sa mga biktima nga Leysam (Leyte-Samar) ang pundok sa mga Ilonggo.

Apan ning pagsulat sa balita wala pa gihapoy nakitang bag-ong kalamboan ang kapolisan tungod kay pagkasunod adlaw human sa krimen namalhin og pinuy-anan ang mga kaubanan sa mga biktima.

Hinungdan nga misamot ang pagduda nga posibleng dunay kalambigitan ang panagbangi sa grupo.

Ning bag-uhay lang mitug-an ang Homicide Section nga duna silay bag-ong anggulo nga gisubay human mapakita sa mga testigos ang hulagway sa mga posibleng suspek nga giingong mga notadong "mamirahay" sa dakbayan.

Giingong mimay-ong sa hulagway sa suspek nga mipusil sa mga biktima niadtong tungora ang picture nga gipakita.

Apan midumili hinuon pagtug-an ang kapolisan og dugang detalye kabahin niini sanglit sayo pa kaayo aron ibutyag ang maong anggulo ug padayon pa usab nga naghipos og dokumentos ug pamahayag ang kapolisan kabahin niini.- Edwin Ian Melecio