Pahimangno vs. Hepa A

Ang Department of Health mipagawas og pahimangno batok sa sakit nga Hepatitis A, usa kini ka matang sa sakit nga mohubag ang atay bunga sa Hepa A virus.

Sumala pa sa DOH National Center for Disease Prevention and Control (NCDPC) nga gawas sa pagbakuna, ang kalimpyo sa panglawas maoy labaw'ng paagi aron malikay sa maong sakit.

Aron mamenusan ang impeksyon mitambag ang NCDPC sa publiko sa pagpabukal sa tubig sulod sa 30 minutos, ayuhon pagluto ang pagkaon, kanunayon ang paghugas sa mga kamot nga gamitan og sabon una ug human mangaon, pag-andam sa limpyong pagkaon lakip nga kung gikan sa kasilyas.

Palikayan usab ang mga pagkaon ug tubig nga mapalit diha sa mga aseras tungod kay dili masiguro ang kalimpyo niini.

Ang maong sakit makuha pinaagi sa laway ug hugaw sa tawo lakip na sa dugo, kun makakaon og pagkaon ingon man ang pag-inom og tubig nga dunay Hepa A virus dili malayong matakdan ang mga tawo.

Usa usab sa makaingon nga mataptan sa maong kagaw mao ang paghumod sa mga baha nga dunay mga hugaw nga nagdala sa maong sakit sanglit ang mga kanal maoy numero unong pinuy-anan niini.

Makuha usab kini pinaagi sa dugong kontaminado nga ibalhin sa ubang tawo, pakighilawas sa tawong nagdala ning maong sakit ingon man ang paggamit og dagom sa injiksyon nga ginamit sa tawong dunay sakit niini.

Ang maong sakit inanay nga mamatikdan apan kun kini mogawas nga posibleng grabe na ang kadaut nga nahimo niini sa atay nga posibleng makaingon sa kamatayon sa usa ka tawo. - Edwin Ian Melecio Tanod giapil og kulata dihang miulang sa away Ni Brenda Batuto

Nakulatahan og apil ang usa ka barangay tanod sa Mohon dakbayan sa Talisay human miuwang sa away diha sa ilang lugar niadtong Sabado sa gabii.

Si Benedicto Pardillo, tanod sa Mohon, ug Enandrico Colegado, 38, taga Sitio Libo, Mohon, Talisay ang nabiktima sa pagpangulata.

Ang mga suspetsado mao ang magsuong Herman, 44 ug Rodrigo Pardillo, 46 mga residente sa Upper Mohon sa maong dakbayan. Ang duha natingkagol na karon sa Talisay detention cell.

Ang duha gikatahong pulos hubog dihang nahitabo ang insidente.

Ang magsuong Pardillo nasikop nila ni kapitan Dario Villaber sa Mohon, Dioscoro Canillo tanod sa barangay ug PO1 Melchor Mangupit sa Talisay Police Station.

Base sa imbestigasyon sa kapolisan nga ang magsuong Pardillo pulos hubog ug nagbuhat kini og gubot sa lugar diin gitabangan niini og kulata si Colegado.

Si Benedicto miresponde sa maong insidente ug miuwang sa maong away apan wala mopatuo ang magsuong Pardillo. Hinuon gilakip hinuon kini sa pagkulata sa duha si Benedicto.

Si Herman sa pakighinabi niini sa Banat News kagahapon sa hapon mihimakak sa pasangil batok kanila.

Gibutyag ni Herman nga diha siya sa ilang balay, si Colegado ug si Rodrigo nag-inom og kalit lang kining nagkalalis diin misangpot sa tinukmuray.

Matud ni Herman nga giduol niya ang duha og iyang gitukmod ang iyang maguwang para mouli og kalit lang miabot ang mga tanod og gilakip siya sa pagsikop. -Brenda D. Batuto