Saddam gihukmang mabitay

Kanhi diktador sa nasud sa Iraq nga si Saddam Hussein gikumbiktong bitayon tungod sa pagmando niini sa pagpapatay sa 148 ka mga tawo sukad niadtong 1982.

Kanhi diktador sa nasud sa Iraq nga si Saddam Hussein gikumbiktong bitayon tungod sa pagmando niini sa pagpapatay sa 148 ka mga tawo sukad niadtong 1982.

Lakip sa gisentensiyahan mao ang duha pa ka mga opisyales ilawom sa pamunoan ni Hussein nga si Barzan al-Tikriti ingon man si Awad Ahmed al-Bandar.

Si Barzan nga igsuon ni Saddam maoy gitumbok nga intelligence chief sa militar niadtong gihuptan pa sa diktador ang gobiyerno sa maong nasud.

Samtang si Awad napamatud-ang maoy hukom sa kangaroo court sa maong nasud niadtong panahona nga mimando sa pagpapatay sa mga Shiite muslims sa maong nasud.

Gisentensyahan usab ang kanhi bise presidente sa Iraq nga si Taha Yassin Ramadan sa pagkabilanggo sa tibuok kinabuhi ingon man ang tulo ka mga opisyales sa Baath party gikan sa Dujail ang gikumbikto usab og mabilanggo sulod sa 15 ka tuig.

Ang desisyon gikalipay og maayo sa mga Iraqis sumala pa sa ambasador nga si Zalmay Khalilzad, matud pa sa opisyal nga gisilutan ang kanhi diktador sa iya rang mga kaugalingong mga kababayan.

Ang diktador maoy gikahadlukan sa mga kanasuran sa Middle East tungod sa mga bahad niining atakihon ang mga silingang nasud ug mimando usab sa paghiusa sa mga muslim nga batukan ang mga langyaw.

Kahinumduman nga si Saddam misuway unta sa pagtago diha sa iyang gamay'ng lungsod sa Tikrit human mapildi sa pakigubat ngadto sa mga sakop sa tropang Amerikano apan dangtan sa pila ka buwang pagpangita kaniya nakit-an kini ilawom sa gamay'ng bangag sa karaan niining balay diin usa ra ka tawo ang makasulod.